بسكويت العيد......

السلام عليكم ورحمة الله وبركاته

ازيكن يابنات انا سعيدة جدا انى هاقدم لكم طريقة بسكوت عيد حلو اوى ودى اول مرة اكتبها فى منتدى

المهم مش هأطول عليكم وهى دى الطريقة

المقادير

3 كيلو دقيق
1 كيلو سكر
2 كوب سمن
1 كوب زيت
1 كوب برتقال
1 باكو بودر
10 بيضة (حجم كبير)
1.5 اوقيه نشادر
فانيليا
(ممكن لو تحبى شوية جوز هند لإضافة نكهه للبسكوت)

الطريقة

1 - ينخل الدقيق ويوضح عليه البودر ويترك جانبا
2 - يطحن السكر حتى يصبح بودرة
3 - يحضر اناء كبير وواسع يوضع فيه السمن وتضرب جيدا باليد او بالمضرب (انا بافضل اليد) لتصبح سائلة جدا ولونها ابيض وهشه ثم يوضع الزيت وتضرب مرة اخرى جيدا
4 - يضاف الية السكر المطحون ويضرب جيدا حتى يصبح هو الأخر سائلا وهش جدا
5 - يضرب البيض جيدا ويكون هش هو الأخر ويضاف الية الفانيليا (وممكن اوى تضيفى ليمون حتى تضيع رائحة البيض) ويضاف البيض الى الخليط ويضرب جيدا
6 - ضيفى النشادر على كوب البرتقال الدافىء (دافىء وليس ساخن) واسكبيه مباشرة على الخليط السابق
7 - بعد ذلك ضيفى الدقيق قليلا قليلا (شوية شوية) ودى اهم خطوة يتوقف عليها جودة العجينة بعد كدة لما تضيفى الدقيق على الخليط لا تلف (لاتتلت) بمعنى اصح تتجبس يعنى تعجنيها اكنك بتكوريها واوعى تلفيها او تلتيها مثل باقى المعجنات ولو تحبى تضيفى جوز الهند ضفيه فى اى مرة تحبيها
8 - يوضع فى المفرمه ويخبز فى فرن هادىءوليس هادىء جدا

وبالهنا والشفا وسأنتظر تجربتكم للطريقة وابداء رأيكم ان شاء الله

وعلى فكرة الطريقة دى مضمونه ان شاء الله وماتخافوش جربوها

بس لو فشلت معاكم يبقى انتم مش شاطرين انا مليش دعوة هههههههههه.